Base sa talaan sa Department of Education (DepEd) Lapu-Lapu City Schools Division kagahapon sa buntag, Hulyo 27, 2022, nikabat na og 26,000 ka mga tinun-an an ang na-enroll sa mga publiko ug pribadong tunghaan alang sa school year (SY) 2022-2023.

Kini ang gibutyag ni Maria Mitze Zagales, senior education program specialist - planning and research sa DepEd Lapu-Lapu.

Naa na sa 13.1 porsyento sa 129,000 nga gibana-bana nga gidaghanon sa enrollees sa public ug private schools sa dakbayan.

Si DepEd Lapu-Lapu Division Superintendent Dr. Wilfreda Bongalos, sa sayo pa, nagkanayon nga dul-an sa 110,000 sa publiko ug 19,000 sa pribadong tunghaan ang gipaabot nga motungha sa SY 2022-2023.

Si Zagales nagkanayon nga 14,234 sa 26,432 ka mga tinun-an sa elementarya ang na-enroll na ug 7,073 sa junior high school.

Dul-an sa 3,204 ka mga tinun-an usab ang na-enroll sa senior high school samtang 2,101sa kindergarten.

Ang enrollment nagsugod niadtong Lunes, Hulyo, 25, 2022 ug motapos sa Agusto 22, 2022, diin mao usab ang pag-abli sa klase.

Ang Lapu-Lapu City dunay 81 ka public schools, 44 niini elementary, samtang 27 sa junior high ug 10 sa senior high schools.

Matod ni Bongalos, sa sayo pa, 70 ka private schools ang mopatuman sa limited face-to-face classes o moabli sa klase karong Agusto, diin ang uban niini nagsugod na sa blended learning ning buwana.

Samtang, ang DepEd nagkanayon nga ang mga tunghaan sa elementarya ug sekondarya sa publiko ug pribado mobalik na sa normal nga five-day face-to-face sa Nobiyembre 2, 2022 bisan unsa pa ang alert status sa maong panahon apan ipatuman gihapon ang minimum health protocols.

Samtang, si Mandaue City Mayor Jonas Cortes nagkanayon nga nagpadayon ang ilang pagpang-ayo sa mga pasilidad ug tunghaan nga nadaut sa bagyong Odette sa Disyembre sa miaging tuig.

Matod ni Cortes, ang Siyudad motabang sa plano sa DepEd bahin sa pagpangandam sa face-to-face classes.

Ang Mandaue City dunay 45 ka public schools ug dili mominos 50 ka private schools.