USA ang patay ug duha ang angol sa usa sa tulo ka mga sunog nga girespondihan sa kabomberohan sa Dakbayan sa Sugbo sa Huwebes, Marso 4, 2021.

Sa sunog sa Sityo Laguna, Pobre Village, Barangay Bulacao, usa ka 28 anyos nga babaye nga gihulagway nga person with special needs, namatay.

Duha ang nangaangol.

Matod ni SFO1 Novo Erana sa Cebu City Fire Department, ang alarma sa sunog ilang nadawat alas 3:02 sa hapon ug tulo ka minutos ang milabay, niabot ang labing duol nga fire truck.

Giila ni Erana ang namatay nga si Maris Bayaton, 28, gihulagway nga person with special needs.

Si Maris didto sa ikaduhang andana natulog. Tungod kay nagkaanam og kadako ang kayo, wa na siya maluwas.

Dugang ni Erana nga tulo ka mga balay ang naugdaw samtang P200,000 ang danyos.

Matod ni Erana nga usa sa ilang gisusing hinungdan sa sunog mao ang butane nga nibuto makaduha ka higayon.

Si Erana niingon nga base kini sa sulti ni Ernita Bayaton, 58, inahan ni Maris.

Apan giklaro ni Erana nga ila pa gihapon balikan karong adlawa ang fire scene aron mokuha pa og dugang kasayuran.

Si Melanie Bayaton, igsuon ni Maris nga nahinabi sa Superbalita Cebu, niingon nga si Maris ang ikalima ug kamanghuran nila nga igsoon.

Si Melanie nagpuyo tupad ra sa balay nga nasunog, niingon nga usa niya ka igsuon nisinggit nga nanimahong sunog.

Dali silang nanggawas uban sa iyang inahan ug higala nga nangatulog.

Iya usab nga gisapupo ang iyang anak.

Matod ni Melanie iya pa untang sak-on si Maris, apan dako na kaayo ang kayo.

Giangkon usab ni Melanie nga butane ang gigamit sa iyang inahan ingon man siya, apan wa siya masayod kon butane ba ang tinubdan sa kayo.

Ang sunog sa Bulacao usa sa tulo ka mga sunog nga girespondihan sa kabomberohan.

Ang una mao ang pagkasunog sa usa ka sakyanan sa dan Colon, Siyudad sa Sugbo.

Ang ikatulo mao ang pagkasunog sa usa ka garahian sa Maria Luisa Village, Banilad, Cebu City nga napawong ra usab dayon. /