Moabot na sa 2,023 ka mga benepisyaro sa 24 ka barangay sa dakbayan sa Lapu-Lapu sa programa nga Assistance to Individuals in Crisis Situation (AICS) sa Department of Social Welfare and Developmemt (DSWD) 7 niining padayong nasinati nga pandemiya sa Covid-19.

Ang pundo sa maong programa nga mokabat na P3 milyunes gikuha sa congressional fund ni Kongresista Paz Radaza.

Tag P1,500 ang nadawat sa matag usa nga alang sa kongresista igo na kaayo nga makatabang sa ilang pagpamalit og essential goods niining panahon sa pandemiya.

Gipahigayon ang pagpang apud-apod sa ayuda niadtong Hunyo 7 hangtod sa Hunyo 9.

“Lisod gyud karon kay pandemic, daghan ang nawad-an og panginabuhian, mao nga kining financial assistance nga atong gihatag karon dakong alibyo kini sa ilang kahimtang,” matod ni Radaza.

Dugang ni Radaza nga padayon siya nga maningkamot sa kaulohan alang sa pagpangita og dugang pundo aron daghan pa nga mga Oponganon ang makabenepisyo sa mga programa nga gikan sa iyang buhatan.

Iya usab giawhag ang mga Oponganon nga dili magmakuli sa pagduol sa iyang buhatan kon nanginahanglan og medical assistance, burial assistance, educational assistance lakip na ang hospitalization sa Vicente Sotto Memorial Medical Center VSMMC diin duna siyay dakong pundo nga gigahin alang sa indigent families nga ma-admit sa nahisgotang tambalanan. (GCM)