GISUGDAN na sa Cebu City Government ang pag-inject a ikaduhang dose sa bakuna batok Covid-19 para sa frontliners sa vaccination centers sa Robinsons Galleria ug UC Banilad campus, Mayo 10, 2021.

Si Doctor Jeffrey Ibones, pangulo sa Cebu City Health Department (CCHD), nagkanayon nga dul-an 800 ka mga indbiduwal ang ilang nabakonahan sa ikaduhang dose sa Sinovac.

Gumikan niini, ang pagbakuna sa first dose ngadto sa senior citizens, persons with comobirdities temporaryo unang gihunong sanglit giprayoridad ang mo-due sa ilang 2nd dose.

Apan dunay kapin 100 ka senior citizens ug persons with comorbidities ang natirahan og 1st dose kagahapon, Mayo 9, apan human niadto, wala na sila nanawat og laing benepisyaryo kay magkuwang na ang ilang bakuna.

Ang City Government subli unya nga mopahibawo sa mga senior citizen (A2) ug adunay gihambin nga balatian(A3) sa higayon nga maabot na ang laing suplay sa Sinovac vaccine para makapadayon og pamakuna.

“Second dose una ta until Wednesday pero og maabtan ta og vaccine sugod napud ta inig Wednesday pero hangtod nga wa pay laing vaccine moabot from DOH, second dose una ta,” padayag sa pangulo sa CCHD.

Matod pa ni Ibones nga sa Cebu City, niabot na og kapin sa 30,000 ang nabakunahan sa vaccination rollout nga gidumala sa Cebu City Hall.

Ang City Government naghuwat pa sa dugang dose sa bakuna nga maabot gikan sa national government para sa ilang unang pagbakuna. (PAC)