Tulo ka emerhensiya ang gitubag sa personnel sa City Disaster Risk Reduction and Management Office (CDRRMO) sa dakbayan sa Sugbo atol sa Ironman 70.3 Triathlon Philippines gikan sa dakbayan sa Lapu-Lapu ngadto sa lungsod sa Cordova agi sa CCLEX paingon sa dakbayan sa Sugbo kagahapon sa buntag, Agusto 7, 2022.

Si Harold Alcontin, section head operations and warning division sa Cebu City DRRMO, nibutyag nga tulo ka mga managlahing kaso ang girespondihan sa Emergency Management Services (EMS) personnel.

Unang girespondehan sa EMS mao si Glenn Regado, biker 648, nakaangkon og samad sa wala nga bahin sa iyang tuhod human ma-slide sa dalan sa SRP nunot sa naputol nga aspalto nga niresulta sa iyang pagka out balance.

Ikaduha mao si Joy Pamisa, biker 1081, kinsa wala mopadayon tungod dili na mabuka ang mata kay gihalangan sa singot.

Ug ang ikatulo mao si American national nga si Marc Chung, biker 767, girespondihan tungod nagsige kini og suka. Matod sa langyaw nga nabag-ohan kini sa klima gikan sa ulan unya mokalit nga init.

Dugang istorya bahin sa Ironman 70.3 Triathlon Philippines naa sa pahina sa sports ning mantalaan.