TULO ka mga barangay sa Siyudad sa Sugbo nga taas og mga kaso sa coronavirus disease (Covid-19) patutukan sa mga personnel sa task force Kasaligan aron mamadlong sa mga tawo nga wa motuman sa minimum health standard.

Ang tulo ka mga barangay mao ang Guadalupe, Lahug ug Apas, diin nabantayan nga ningbalik ang kompyansa sa mga tawo.

Matod ni Police Colonel Josefino Ligan, officer-in-charge sa Cebu City Police (CCPO) nga sa dihang ilang gisusi ang tulo ka mga barangay, daghan pa sa mga tawo ang wa motuman sa minimum health standard sama sa sakto nga pag sul-ob sa mask ug face shield.

Tungod niini, iyang pabalikan sa mga personnel sa task force Kasaligan ang maong mga barangay dungan sa bahad nga iya nang panakpon ang mga gahig ulo.

“Magtuyok mig balik sa inyong AOR (area of responsibility) sa inyong mga barangay. Rest assured kon the same person mo, we will be arresting you, we will be filing you disobedience in that respect kon dili gihapon mo mopatuo,” matod ni Ligan. (AYB)