PROBLEMA sa trapiko sa mga dakbayan sa Talisay, Sugbo ug Mandaue ang tukion sa mga mayor sa nahisgotang managsilingang dakbayan aron masulbad.

Lakip sa hisgutan karon sa tulo ka mga mayor ang mga dagkong isyu nga nagdugtong sa tulo ka mga siyudad sama sa basura.

Atol sa pakighinabi sa mga tigbalita kang Mandue City Mayor Jonas Cortes, iyang gibutyag ang nahitabong panagkita nila ni Cebu City Mayor Edgardo Labella ug Talisay City Mayor Gerald Anthony “Samsam” Gullas.

Matod sa mayor nga nahisgutan nila ang maong mga problema ug buot sa tulo nga iladlad sa traffic management team sa tulo ka siyudad ang traffic plans aron mahan-ay ang pagdumala niini.

Matod ni Cortes, kinahanglan nilang hisgutan ug hiusahon ang mga ordinansahon sa trapiko alang sa maayong resulta sa serbisyo.

“Openly ako giingnan si Mayor Labella nga we have to discuss, we need to coordinate our traffic ordinances kay bisan unsa pana ka modern atong command centers ug wa tay coordination useless gihapon," dugang ni Cortes. (ANV)