NASIKOP sa drag net operation sa Minglanilla Police Station ang tulo ka gikatahapang mga tulisan human manulis alas 3 sa kaadlawon sa Biyernes, Oktubre 18, sa Barangay Poblacion Ward 3, lungsod sa Minglanilla, Sugbo.

Unang nasikop giila nga si Donne Justine Suquib Nocete, 22, taga Pungsod, Barangay Lawaan, Siyudad sa Talisay.

Ang gitulis sa suspek giila nga si Michelle Asimus, 36, nagpuyo sa Barangay Poblacion Ward 3, Minglanilla.

Nakuha ang iyang bag nga adunay sulod nga cellular phone, relo nga bulawan, $6 U.S dollars ug P3,500 cash.

Matod ni Police Captain June Banate Tabigo-on, hepe sa Minglanilla Police Station, nga sa pagka alas 5:30 sa Biyernes sa kaadlawon, usa ka motorsiklo gikawat. Sa pakisusi, nasuta nga ang nanulis sa Ward 3 mao ra usab ang nikawat sa motor.

Sa drag net operation nasikop nila ang lain pang duha nga silang Donime Cortez Caballero, 22 ug Arnold Ravanes Echavez, 24, taga sitio Lagtang, Barangay Tabunok, Siyudad sa Talisay. (AYB)