DI NA makabalik sa ilang mga luna ang mga apektado sa sunog sa Barangay Tabok, siyudad sa Mandaue nga anaa sa sulod sa three-meter easement zone sa Butuanon River.

Kini human gianunsyo ni Mandaue City Mayor Jonas Cortes niadtong Lunes, Pebrero 17, nga ipabalhin ang mga residente nga nagpuyo duol sa Butuanon River.

Kini human nadiskubrehan sa Research Institute of Tropical Medicine sa Department of Health (DOH) nga positibo sa poliovirus ang Butuanon River.

Sigon ni Dario Tarriman, barangay kapitan sa Tabok, nga makig-coordinate siya sa mga opisyal sa Siyudad sa Mandaue kon asa ang temporaryong kapuy-an sa maong mga residente nga apektado sa easement zone.

Sa 881 ka mga residente nga gitutokan nga pabalhinon, anaay dul-an sa 28 ka mga balay sa Barangay Tabok ang apektado usab sa three-meter easement.

Sa 28 ka mga balay, naay nasunogan niini niadtong Lunes, Pebrero 17.

Adunay 269 ka mga pamilya ug 950 ka mga indibidiwal ang naapektohan sa sunog.

“Makabalik ra sila kay murag nag-abang paman sila ug yuta. Ang naay portion siguro ang di kabalik katong naigo sa three-meter easement sa Butuanon River,” saysay niya.

Dungag ni Tarriman nga nihatag ang provincial government sa mga nasunogan og bugas ug pipila ka gamit sa kusina alang sa mga nasunogan.

Posible nga kutob na lang kagahapon, Pebrero 20, ang mga residente nga anaa nga temporaryong nag-estar sa Tabok gym human sa sunog. Ang gym gamtion sa ubang kalihokan sa barangay. (JCT)