Tulo ang nangamatay human usa ka motorsiklo nibangga sa gikasugat nga bus de pasaheroan alas 7:30 sa gabii sa Huwebes, Hulyo 28, sa national highway sa Brgy. Poog, Dakbayan sa Toledo.

Si Felimon Tagactac, 53, minyo, taga Brgy. Matab-ang, dakbayan sa Toledo, driver sa Calvo bus, gikustudiya sa kapulisan human sa insidente.

Ang nangamatay giila sa kapulisan nga sila si Benjamin Aria Pracueles, 61, minyo, habalhabal driver, taga Brgy. Bunga, Toledo City samtang ang iyang duha ka mga pasahero mao sila si Maricel Aliganga Canoy, 40, minyo, manikyurista, taga Sityo Upper, Poog ug iyang silingan nga si Marina Son Villacencio, 53, minyo, manikyurista.

Si Police Staff Sgt. Nicanor Goc-ong, imbestigador sa Toledo Traffic Police nga nahinabi sa Superbalita Cebu, nagkanayon nga ang mga biktima sakay sa motorsiklo padulong mopauli.

Kusog nga nakapadagan si Pracueles gikan sa Campo 10 sa Brgy.Poog samtang nagsubay sa national highway.

Apan sa kalit lang, nibuto ang ligid sa atubangan sa motorsiklo.

Gumikan niini, nawad-an sa kontrol sa manobela si Pracueles ug nibangga sa gikasugat nga bus gikan sa dakbayan sa Sugbo.

Sa kakusog sa impact sa panagbangga, nangalagpot ang mga biktima ug grabe ang naangkong kadaut sa kalawasan.

Namatay diha-diha si Pracueles samtang si Canoy nabugtoan sa kinabuhi sa tambalanan.

Paglabay sa usa ka oras, namatay usab si Villacencio dihang ibalhin na unta sa tambalanan sa dakbayan sa Sugbo.

WAY HELMET

Matud ni Goc-ong, nga ang mga biktima wa nagsul-ob og helmet. Ang mga manikyurista suki na ni Pracueles ug maoy tigkuha nila gikan sila mangmanikyur.

“Klaro sa sked mark nga ang driver sa bus naningkamot paglikay pero naghaguros ang motorsiklo, diretso mibangga,” dugang ni Goc-ong.

Ang mga pamilya sa mga biktima, driver ug representante sa bus company nagkasabot alang sa pagpahiluna sa namatay ug way ipasaka nga kaso.