USA ka 30-anyos nga lalake nalandig sa tambalanan human naligsan sa awto samtang nagbiyahe sa may UN avenue, Brgy. Umapad, Dakbayan sa Mandaue pasado alas 7 sa Miyerkules sa buntag, Marso 4.

Ang biktima giilang si Charlie Codiñera, 30, taga Tawason, Dakbayan sa Mandaue.

Samtang ang nakabangga kaniya usa ka Suzuki Swift nga gimaneho sa usa ka Bernadette Rosal, taga Pajac Dakbayan sa Lapu-Lapu.

Base sa imbestigasyon sa Mandaue City Police Office (MCPO) Traffic Division, si Codiñera nagmaneho sa iyang motorsiklo dihang nabanggaan og Toyota Fortuner nga gimaneho ni Chris Benedict Cartel, 30, taga Tunghaan, Minglanilla.

Human mabanggae, nahulog si Codiñera sa iyang motorsiklo ug didto na maligsi sa gimanehong sakyanan ni Rosal nga miresulta sa iyang pagka angol.

Dali siyang gidala sa Mandaue City District Hospital ug gibalhin sa Vicente Sotto Memorial Medical Center (VSMMC).

Dihang nahinabi ning mantalaan, si Police Master Sergeant Richard Suycano, duty desk officer sa MCPO Traffic Division, nikompirmar nga luwas na sa makuyawng kahimtang si Codiñera.

“Sa among nahibaw-an diri man tong amahan. Okay ra daw iyang anak. Gibalhin lang og Vicente Sotto. Ingon ra siya e-hold lang license sa mga driver kay akong bata akong i-transfer sa Vicente Sotto. Gusto niya patabangan sa ospital”, matod ni Suycano.