USA ka 31-anyos nga lalake ang gipusil ug gitiwasan sa pagpatay pinaagi sa pagtigbas sa Sitio Dam, Barangay Poblacion 2, dakbayan sa Carcar kagahapon, Nobiyembre 1, sa alas 11:30 sa buntag.

Ang biktima mao si Wilson Ledesma, ulitawo ug taga Sitio Tangasan, Barangay Valladolid, dakbayan sa Carcar, kinsa patay dihadiha human nakaangkon og samad pinusilan sa ulo ug sa iyang lawas.

Wala pa madakpi sa kapulisan ang duha ka mga mamumuno.

Si Police Corporal Chuck Dayuda, imbestigador sa Carcar Police Station nga nahinabi sa Superbalita Cebu, nagkanayon nga drugas ang motibo sa krimen ang ilang gisubay.

Wala lang una nila ibutyag ang pangalan sa duha ka mga responsabli kay nagpadayon ang ilang paggukod niini.

Sumala pa niya nga nagtuo sila nga nipalit og drugas ang biktima o sige nagduwa niini.

Ang ilang nakuhang impormasyon naabot ang biktima sa maong lugar sakay sa iyang motorsiklo.

Apan kalit nga gipusil, unya human mahagba, gitiwasan sa pagtigbas.

Ang nakakita mibutyag nga human sa krimen, dunay giitsa nga pinakite nga shabu ang mga mamumuno.

“Kini drugas amo gitan-aw kay human sa pagpatay gilabayan og unom ka pakite nga shabu,” dugang ni Dayuda.

Nigawas sa ilang impormasyon nga ang biktima nabilanggo na kaniadto tungod sa kaso sa drugas.

Tungod niini, nagtuo sila nga posibling nagkabangi sa negosyo nga illegal nga drugas ang biktima ug mga mamumuno.

Nakuha nila sa crime scene ang upat ka kabhang sa bala sa .9mm pistol ug ang unom ka mga pakete nga gidiling drugas.