ADUNAY 326 ka mga bike lane violator ang nahatagan og citation ticket sa Traffic Enforcement Agency of Mandaue (Team) sukad niadtong Enero 1 hangtod Marso 15, 2021.

Bisan gipatuman na sulod sa siyam ka buwan ang pagparespeto sa bike lane, padayon gihapon nga daghan ang mosupak niini.

Matod ni Edwin Anthony Jumao-as, pangu sa Team, nga sagad sa mga mosupak sa bike lanes mga magmaneho og motorsiklo.

Sigon niya nga tungod kini kay makita sa mga magmotorsiklo nga hawan ang bike lane ug di na sila muagi pa sa kahuot sa trapiko.

Apan, gipatuman sa Dakbayan sa Mandaue nga ang bike lane eksklusibo nga gamiton alang sa mga magbisikleta aron maprotektahan sila sa mga motor-powered nga mga sakyanan.

Sa paghingusog sa Team sa ilang operasyon nakadakop sila og 326 ka mga violators sud sa dul-an tulo ka buwan.

Ang pagsupak sa bike lane adunay multa nga P1,000.

Gani, matod ni Jumao-as nga aduna nay 212 ka mga violators ang nibayad na sa ilang multa.

Pasabot niini, nga gikan sa Enero ngadto sa Marso 15, 2021 nakakolekta ang Team og P212,000 gikan sa multa sa pagsupak sa bike lane ordinance.

Nakita nilang Jumao-as nga daghan pa ang di morespeto sa bike lane hinungdan nga kada-adlaw aduna silay ipahigayon nga random operation sa mga bike lanes matag alas 6 sa buntag hangtod alas 8 sa buntag ug alas 5 sa hapon ngadto sa alas 6:30 sa hapon.

Sagad sa ilang madakpan anaa magsubay sa A.C. Cortes Ave. ug Ouano Avenue.

Matod ni Jumao-as nga permamente na kini ang ilang random operation hangtod nga makasabot na ang tanang motorista nga muagi sa dakbayan nga seryoso ang Team sa pagpatuman sa bike lanes ordinance.

Gawas niini, miingon sab si Jumao-as nga adunay pipila sab ka mga sakyanan ang ilang nadakpan human nag-loading ug unloading tungod sa plastic bollards sa bike lanes.

Matod ni Jumao-as nga mamahimo rang maka-loading ug unloading sa shared bike lanes. Pasabot nga ang bahin sa bike lanes nga pintal lang ug way plastic bollards ug concrete delineators mahimong mahunongan.

Kon mohunong sab sa shared bike lane, gipasabot ni Jumao-as nga hatagan gihapon og igong agianan ang mga bike nga moagi.

Sa laing bahin, niingon si Jumao-as nga maghimo unya og balaod ug multa ang konseho sa dakbayan alang sa mga magbisikleta nga dili sab mosubay sa bike lanes.