Ang ‘Oplan Bulabog’, gihunong sa pagdeklarar sa Alert Level 1 status sa kaso sa Covid-19 sa dakbayan sa Sugbo, gibalik karon sa kapulisan sugod sa Miyerkules sa kaadlawon, Agusto 10, human mabantayi nga daghan na sa menor de edad ang nanggawas sa lawom nga gabii hangtod sa kaadlawon, ang uban nalambigit sa krimen.

Si Police Lt. Col. Wilbert Parilla, deputy director for administration sa Cebu City Police Office (CCPO), niingon nga ang oplan nagsentro sa mga menor nga mogawas sugod sa alas 12:00 sa tungang gabii hangtod sa alas 5:00 sa kaadlawon apan walay labot ang mga hamtong.

Atol sa dungan nga Oplan Bulabog sa police stations kagahapon sa kaadlawon, nakaluwas sila og 34 ka mga menor nga ilang gi-turnover sa City Social Welfare and Services (CSWS).

Human maproseso, gidala sa barangay diin nagpuyo ug gipakuha sa ilang ginikanan.

Ang mga ginikanan giawhag sa kapulisan nga monitoron ang ilang mga anak panahon sa kagabhion.

Gimandoan ni Parilla kadtong mga pulis sa barangay (PSB) nga mo-report sa ilang tagsa-tagsa ka barangay diin sila nadestino aron ipatuman ang ordinansa sa curfew.

Magpatabang sila sa mga opisyal sa barangay sa pagpatuman sa curfew.

Matod ni Parilla nga dako og matabang sa barangay sanglit sila na ang mo-roving sa mga sudlonon nga bahin.

Makigtagbo siya sa bise mayor aron matuki ang kasamtangang ordinansa nga gi aprobahan sa Konseho niadtong 2020.