MOABOT sa 34 metric tonelada ka mga basura ang nahakot atol sa Mananga river clean-up, Biyernes sa buntag, Agusto 23.

Lakip sa gilimpyuhan ang mga creek nga nakapalibot sa Mananga, diin 19 metric tons gikan sa sapa ug 15 gikan sa creek.

Plastik nga mga bulseta ug nagkadaiya pang klase sa mga plastic nga basura ang kadaghanan nga nabantayan nga nagkatag sa pipila ka kilometro nga sapa sa Mananga.

Kini ang nabantayan sa mayor sa Siyudad sa Talisay atol sa clean-up drive nga nagsugod sa alas 6 hangtud sa alas 9 sa buntag.

Tungod niini, gitug-an ni Mayor Gerald Anthony Gullas nga pakigtagbuan niya ang konseho sa Siyudad sa Talisay aron sa pagpakisayod sa existing nga ordinansa batok sa mga plastic, alang sa posibleng amendment, aron mabutangan na og ngipon.

Kon estrikto na nga mapatuman ang ordinansa kalabot sa paggamit sa mga plastik.

Mga plastik nga basura nakita ug nakuha atol sa pagbaha niadtong Agusto 20, sa Barangay Bulacao ug Linao, human sa pagbundak sa kusog nga uwan.

Buot usab sa mayor nga sutaon gikan sa konseho ang pamaagi aron aduna nay Talisay City Environment and Natural Resources Office, ang Siyudad.

Kini aron maoy makatutok, niining problema sa pagproteher sa kalikupan, ilabi na sa kasapaan.

Libuan ang ningtabang sa clean-up drive, lakip na mga kawani sa city hall ug volunteers gikan sa nagkadaiyang sector ug ahensya sa gobyerno.