Kapulisan sa probinsya sa Sugbo nakadakop og 341 ka mga sugarol sulod sa 180 ka anti-illegal gambling operations.

Sa data nga gipakita ni Police Lieutenant Colonel Mark Gifter Sucalit, deputy provincial director for operations sa Cebu Police Provincial Office (CPPO), lakip sa nasakmit ang kuwarta sa sugal nga balor og P47,818.

Ang labing daghan nga nadakpan mao kadtong nalambigit sa illegal numbers game nga swertres, gisundan sa hantak kun cara y cruz, card games, tigbakay ug mahjong.

Nakadakop usab sila og 17 ka mga tawo nga nalambigit sa lainlaing matang sa illegal nga sugal sama sa billiards ug basketball nga nagpinustaanay samtang nagduwa niining maong matang sa paugnat sa kusog.

Gipasabot ni Sucalit nga nag-una ang illegal swertres nga maoy gihimong kalingawan sa mga tawo sa kalungsuran nga maoy gipatutukan sa ilang mga personnel aron kini masumpo kay way permit ang operation.

“Parang naging kultura na, past time nang mga tao ang kining pag gamble but sad to say when it comes to betting already or involvement of money, so illegal na sya,” matod ni Sucalit.

Dugang ni Sucalit nga ilang gihingusgan karon ang kampanya batok sa illegal nga sugal tungod sa reklamo sa legal nga STL operator sa probinsya sa Sugbo nga naghitak ang nagkalainlaing matang sa sugal.

Samtang gi-monitor sa kapulisan sa siyudad sa Sugbo ang laing matang sa klase sa sugal nga gipaagi sa online sama sa tong-its ug bacarat, diin ila kining i-coordinate sa ilang legal department aron masuta kon unsay ilang mahimo ug tukmang lakang nga buhaton.