NAKUHAAN og moabot sa 40 gramos nga gituohang shabu nga gibanabanang mokantidad og P272,000 ang usa ka 37-anyos nga babaye sa gipahigayong buy-bust sa City Intelligence Unit ug City Drug Enforcement Unit sa Lapu-Lapu City Police Office (LCPO) pasado alas 3 sa hapon niadtong Pebrero 26.

Ang mga ilegal nga drugas gisulod og usa ka belt bag.

Ang maong babaye kinsang pangalan gipugngan lang una ning mantalaan gumikan kay aduna pay followup operation ang kapulisan, nasikop sa Pajac Proper sa dakbayan sa Lapu-Lapu.

Matod ni Police Colonel Arnel Banzon, director sa LCPO, nga ang dinakpan usa lang unta ka street level individual, apan sa kadaghang nakuha sa iyang posisyon, sila nagduda nga adunay dakong nagpaluyo sa dinakpan.

Mao kini karon ang subject sa ilang ipahigayong follow-up operation.

Bunga ang pagkasikop sa naasoyng babaye sa paningkamot sa ilang mga operatiba nga gipangulohan ni Police Major Joey Bicoy isip tampo sa ilang Simultaneous Anti-Criminality Law Enforcement Operation (SACLEO) sa LCPO sukad niadtong Pebrero 26 hangtod 28.

“Kuan na ni siya naa tay monitoring watchlist ni siya pero street level ra unta mao nang di pa pwedi namo e ano,” pasabot ni Banzon sa Superbalita Cebu. (GCM)