Mokabat sa 38,773 ka benepisyaryo sa Assistance to Individuals in Crisis Situation (AICS) sa Department of Social Welfare and Development (DSWD) sa Central Visayas ang nahatagan og special educational assistance.

Si DSWD 7 Regional Director Shalaine Lucero nitug-an sa SunStar Cebu sa Sabado, Septiyembre 24, 2022, nga ang maong mga benepisyaryo mao kadtong nahatag gikan sa ilang nagpadayong financial distribution gikan sa Agusto 20 nga natapos sa Septiyembre 23.

Matud ni Lucero nga kinatibuk-ang P104.7 milyones ang gihatag sa DSWD alang sa educational assistance sa rehiyon.

Sa ilang breakdown niadtong Septiyembre 24, dul-an sa 10,488 ka mga benepisyaryo ang nahatagan gikan sa Probinsiya sa Sugbo nga adunay mga P30.61 milyones nga cash, gisundan sa Negros Oriental nga adunay 5,527 ka mga benepisyaryo ug P15.5 milyones nga hinabang pinansyal ang gihatag, ug ang Siquijor nga adunay 480 ka mga benepisyaryo ug P1. 2 milyones nga financial assistance ang nahatag.

Alang sa tri-city, ang Cebu City maoy adunay labing daghan nga benepisyaryo nga nahatag nga adunay 11,135 ug mga P28.4 milyones nga cash ang gihatag, gisundan sa Lapu-Lapu City nga adunay 5,136 ka benepisyaryo ug P13.3 milyones nga cash, ug Mandaue City nga adunay 3,255 ka benepisyaryo ug P8. 2 milyones nga cash assistance nga gihatag.

PROBLEMA

Matud ni Lucero nga ang hagit nga ilang nasugatan sa tibuok distribution mao nga mga tinun-an nga narehistro napakyas sa pagtambong sa ilang gitakdang petsa sa pag-apod-apod.

Matod ni Lucero nga pipila sa maong mga tinun-an adunay klase atol sa ilang schedule, busa napakyas sila sa pag-claim sa ilang hinabang. Apan gihatagan sila sa ilang educational assistance pagkahuman sa buhatan sa DSWD uban sa koordinasyon sa ilang mga Local Government Units (LGUs).

Matud ni Lucero nga pipila ka mga indibidwal nga nagparehistro nga adunay dili kompleto nga mga kinahanglanon wala nahatagan og pinansyal nga tabang.

Gawas niini, si Lucero niingon nga dunay mga nireklamo nga dili sila makasulod sa website aron makaparehistro.

“Some of them (beneficiaries) have no internet connection, and some failed to get into the website because of the traffic with all the people trying to register every time our website opens for registration,” matod ni Lucero.

Gipasabot usab niya nga dili nila ma-accommodate ang tanang gustong magparehistro kutob sa ilang mahimo tungod kay limitado ang ilang pundo alang sa educational assistance.