SA PANINGKAMOT sa pagpalambo sa malinawon, malipayon ug maayo nga trabahuan, ang dakbayan sa Mandaue milusa sa Search for Gawad Linaw Awards 2019 niadtong Biyernes sa buntag, Abril 26, pianagi sa Tripartite Industrial Peace Council, (TIPC).

Ugma, Mayo 1, Labor Day, mao ang pagsugod sa pagdawat sa mga nominasyon alang sa kategorya sa Small, Medium ug Large Enterprises, lakip na sa unionized ug ununionized firm.

Ang maong programa ang labing una ug nag-inusara pa sa tibuok Central Visayas.

Tinabangan kini sa Mandaue Chamber of Commerce and Industry (MCCI), pinangulohan ni Girlie Garces, ug National Conciliation and Mediation Board (NCMD).

Dakung tinguha sa programa nga kon maayo ug malinawon ang pagtrabaho sa mamumuo, mas makab-ot ang progresibo ug malambuon nga kompanya ug produkto, lakip sa komunidad.

“In this way we are promoting industrial peace in all of our business establishments in the City. If we are also after for the welfare of the workers, we will be succesful in our goals and be more progressive,” asoy ni Bise mayor Carlo Fortuna, kinsa nangulo sa paglusad.

Atol sa paglusad, nitambong ang bag-ong regional director sa Department of Labor and Employment (DOLE)-7, Salome Siaton, kinsa nipadayag sa iyang paghangop sa inisyatiba sa Mandaue ug TICP.

Si Edmundo Mirasol, direktor sa NCMB 7, nibutyag sa gikinahangalan sa mosalmot sama sa negusyo nga naa na sa lima ka tuig pataas ug dunay dili mominos 20 ka mga kawani ug uban pa. (FMD)