UPAT ka tawo nasikop sa duha hugna nga buy bust sa mga sakop sa Provincial Intelligence Branch (PIB) sa siyudad sa Talisay ug siyudad sa Sugbo kapin sa tunga sa milyon ka pesos nga balor sa ilegal nga drugas ug mga linikit nga marijuana nasakmit sa mga operatiba.

Unang nasikop sa mga sakop sa PIB nga gipangulohan ni Police Lieutenant Colonel Marlu Conag, inabagan sa Talisay City Police Station ang usa ka 34 anyos nga drug pusher sa Sitio Bahala sa Barangay Lagtang sa siyudad sa Talisay, alas 5:00 sa kaadlawon niadtong Miyerkules, Agusto 28.

Ang nasikop giila nga si Jude Mar Abastillas Villarosa nga nag puyo ra usab sa maong lugar nga nakuhaan og 25 gramos nga gituohang shabu nga mobalor sa P172,176.00.

Nakadawat og impormasyon ang PIB labot sa ilegal nga negosyo ni Villarosa nga maoy hinungdan nga ila kining gipaubos sa validation ug sa dihang na suta nga tinuod ang report milusad dayon silag buy bust.

Gitug-an sa dinakpan kung asa siya mag kuhaan sa iyang supply nga drugas nga maoy iyang ibaligya nga matod pa taga barangay Pasil sa siyudad sa Sugbo ra usab.

Pagka alas 5:30 sa hapon, mihimo og follow up operation ang mga operatiba sa sitio Magsaysay barangay Pasil Cebu City nga niresulta sa pagkasikop sa tulo ka tawo.

Mga nangadakpan mao silang Stephen Malacaste Cojo, 29, high value target sa probinsya sa Sugbo, Keannu Christian Cabije Labuca, 22, ug Rhyle Cabanday Cabaron, 19, pulos taga dan L. Flores. Sitio Magsaysay. Barangay Pasil.

Si Cojo nga maoy target sa buy bust nasakmitan og upat ka dagkong pakete sa gituohan shabu nga balor sa P579,360.

Samtang si Labuca nakuha sa iyang posisyon ang napulo ka linikit nga marijuana ug si Cabaron nakuhaan usab ug siyam ka stick sa marijuana.

Matod ni Lieutenant Colonel Virgilio Bayon-on ang information officer sa Cebu Provincial Police Office nga taod-taod na nila nga gi panid-an si Villarosa human makadawat og kasayuran nga namaligya kini'g shabu.

“Gi-monitor siya unya human sa monitoring, gi-buy bust dayon and after sa interrogation, iyang gitug-an asa siya ma kuhaan sa supply mao na dayon to ang follow.." matod ni Bayon-on.