UPAT ka mga tighimo og peke nga “official receipt” (OR) sa driver’s license gikan sa Land Transportation Office 7 ang nasikop niadtong Sabado, Oktubre 26, adlaw sulod sa usa ka inilang fast food chain sa eskina dalan Borromeo ug dalan Colon sa Barangay Kalubihan, dakbayan sa Sugbo.

Ang nagsikop mao ang ilang kliyente pinaagi sa citizen’s arrest human nasuta nga mini o peke ang ilang nadawsat nga resibo.

Ang mga suspek giila nga silang Marjon ug iyang igsuon nga si Junimar Cabaluna, Vincent Pitogo Jr., nga pulos nagpuyo sa Barangay Bulacao, ug Fredilyn Germino nga nagpuyo sa dalan Juana Osmeña.

Base sa imbestigasyon sa Police Station 5 sa Cebu City Police Office (CCPO), ang mga biktima nga silang Noraldine Amacsod, Saiven Mipantao nga maoy ni-citizen’s arrest inabagan sa barangay tanod sa magsuong Cabaluna.

Apan sa wala pa kini mahitabo, ang mga biktima lakip na nilang Abdul Mipantao ug Avel Delantes kinsa nibayad og tag P4,000 ngadto sa mga suspek, apan dihang niadto sila sa temporary offsite printing office sa LTO 7, wala ang ilang mga pangalan, hinungdan nga nakabantay sila nga peke ang ilang official receipt.

Sa wala pa kini mahitabo, ilang gisigihan og tawag ang mga suspek apan dili motubag hinungdan nga nigamit sila og laing numero og nagpakaron-ingnon nga mokuha og driver’s license uban sa pagbayad sa maong kantidad ug didto nitubag ang mga suspect dayon ilang gipangsikop.

Atol sa ilang pagkasikop, aduna pay laing mga peke nga OR sa driver’s license ang nakuha.

Si Caindec niingon nga pasakaan og kasong falsification of public documents ang upat ka mga suspek nga na-detain sa Police Station 5. (PAC)