ABI sa mga lalakeng manag-agaw nga puro 5-anyos, pusilpusil ang ilang napalgan ug giduwaan niadtong Lunes sa hapon, Enero 6, 2020, sa Brgy. Cogon, lungsod sa Dumanjug, Sugbo.

Apan diha na nila mahibaw-i nga kini tinuod nga revolver dihang nibuto ug nakaangol sa usa kanila.

Si Major Ardioleto Cabagnot, hepe sa Dumanjug Police Station nga nahinabi sa Superbalita Cebu, nga mga alas 4:30 sa hapon niadtong Lunes, gipahibawo sila sa usa ka gwardiya sa tambalanan nga dunay pagpamusil.

Ilang nasuta nga ang biktima usa ka 5 anyos nga lalake samtang ang suspek 5 anyos nga ig-agaw nga nigamit sa napunitan nga .38 kalibreng paltik nga rebolber nga dunay usa ka bala.

Matod ni Cabagnot nga ang mga bata nanglaag, wa mabantayi sa ilang mga inahan samtang ang ilang mga amahan nagtrabaho sa construction.

Nakasulod sila sa luna sa pamilya ni Jose Cobol, kinsa nang-migrate na sa Mexico.

Ang mga bata niadto sa kubolkubol sa nataran ug napunitan sa duha ang armas ug ilang giduwaduwaan.

“Ang bata nga biktima mitug-an nga nagtongtong siya sa imburnal. Unya gipunting siya iyang ig-gaw sa pagpusil. Wa sila magdahom nga mobuto. Nagtuo lang nga duwaan,”dugang ni Cabagnot.

Human sa usa ka sipang buto, niping-it sa kasakit si Donald (di tinuod niyang ngan) human maigo ang iyang tuong tuhod ug nilahos sa tuong dunggan.

Gipasabot ni Cabagnot, nga kon naintimano pa si Donald, hayan namatay kini.

Nagpadayon ang ilang imbestigasyon kon kinsa ang nanag-iya sa paltik nga armas.

Sa pagsuhid sa iyang mga imbestigador sa dapit, way nakakita sa pagpamusil gawas sa duha ka mga bata.

Wa usay nasayod kinsay tag-iya sa pusil.

Ang armas gi-turnover kini sa usa ka laborer nga si Roself Cobol ngadto sa kapulisan.

Si Donald luwas na hinuon sa makuyaw nga kalimtang, sumala ni Dr. Ian James Pason sa Provincial Hospital sa Dakbayan sa Carcar.