USA sa lima ka mga tulisan nga mitulis sa taxi drayber sa dakbayan sa Lapu-Lapu napusilan-patay sa dihang misukol sa mga pulis, tulo sa iyang mga kauban nasikop samtang usa nakaipsot.

Saysay ni Police Captain Aibert Jay Samson, hepe sa Police Station 5, Lapu-Lapu City Police Office, nga ang lima ka mga suspek nagpaka-aron ingnon nga pasahero nga misakay sa taxi nga gimaneho ni Melchor Antipuesto, 27, taga-Barangay Lahug, Cebu City niadtong Biyernes, Oktubre 30.

Giila ang mga suspek nga sila si: Leonito Pejana, 19, taga-Barangay Pusok; Bryan Tañedo, 23, Sangi-Barangay Pajo; Mhelbert Soroño, San Roque Barangay Pusok; usa ka menor de edad nga 16 anyos nga taga-San Roque, Barangay Pusok ug si Edwin Banjao.

Ang mga suspek ningsakay duol sa tiilan sa Marcelo Fernan Bridge, Barangay Pusok ug nagpahatod sa Lapu-Lapu City Hall nianang pasado sa 10:00 sa gabii

Matod pa ni Samson sa dihang nahinabi sa Superbalita Cebu nga pag-abot sa luyo nga bahin sa city hall sa Mustang, Pusok, kalit nga giliab ang liog ni Antipuesto sa usa sa mga suspek nga diha naglingkod sa luyo.

Samtang ang pasahero sa front seat miti-on kang Antipuesto og armas dayon nideklarar og tulis.

Maayo nalang nga nakalighot si Antipuesto pinaagi sa pag-abli sa pultahan sa taxi dayon dagan ug mikaratil sab og panagan ang mga tulisan sa dihang adunay bystanders nga nakakita sa commotion.

Ang duha ka tulisan nanagan sa may city hall compound nasugatan sa pulis nga nag-roving, apan giapas ni Antipuesto ang duruha nga iyang naabtang gisukit-sukit sa pulis ug nangatarungan nga gipareglahan sila maong nanagan.

“Sir (pulis), mao nay nitulis nako!,” sumala pa sa naggukod nga taxi drayber.

Sa dihang gidala sa police station ang duruha nga dinakpan, nipiyait sa lain pa niyang mga kauban hinungdan nga mipahigayon gilayon og hot pursuit operation ngadto sa Sangi, Barangay Pajo diin maabti ang tulo.

Asoy ni Sayson sa dihang nagpailang pulis ang iyang mga sakop, naalibwag sa pagpanagan ang tulo sa nagkadaiyang direksiyon.

Si Soroño nga armado og rebolber, mibunot sa iyang armas ug nisuway og pusil sa naggukod nga pulis, apan mikagar.

Gibawsan siya ug naigo sa may liog hinungdan sa iyang hinanaling kamatayon.

Si Banjao nga giila nga lider sa maong grupo nakaeskapo.

Si Lapu-Lapu City Mayor Junard Chan nagtuo nga ang maong mga tulisan posibleng maoy responsable sa sunodsunod nga mga lungkab sa mga buhatan sa City Hall nga sagad mahitabo matag Biyernes.

Nanawagan sab ang mayor ngadto ni Banjao nga motahan o sa kadtong mga nakaila o nasayod sa iyang nahimutangan sa pag-report sa buhatan sa mayor o sa kapulisan.

Kasong robbery ang atubangon sa mga suspek. (FVQ)