LIMA ka mga Korean national nasikop sa duha ka managlahing mga operasyon sa National Bureau of Investigation (NBI) 7 sa Barangay Pajo ug Basak, siyudad sa Lapu-Lapu niadtong Miyerkules sa gabii.

Giingong nahilambigit sa online gambling ang maong mga Koreano, diin ang ilang mga parokyano tua ra usab sa ilang nasud o gawas ra sa Pilipinas.

Ang mga nasikop nga Korean national mao silang Kim Sung Youl, Dae Seung Moo, Yang Wondong, Yong Ji ug Jun Song.

Gihimo sa NBI 7 ang operasyon batok kanila pinasikad usab sa search warrant nga giluwatan ni Cebu City Regional Trial Court (RTC) Branch 11 Judge Ramon Daomilas, Jr..

Matod ni NBI7 Regional Director Patricio Bernales nga giabagan sila sa nagkadaiyang telecommunications company sa gihimo nga surveillance sa operasyon sa mga langyaw sa wa pa hingpit nga gilusad ang raid batok kanila.

Nasuta sa NBI nga sagad sa mga parokyano sa gidumala nga online gambling sa mga suspek anaa sa laing nasud.

Gani mao kini hinungdan nga gabii usab mosiaw ang ilang operasyon.

“Actually, it’s offshore. Diri sila ga-operate, ilang parokyano is from outside the Philippines. Ila ra gihapo’ng mga kadugo,” niingon si Bernales.

Gisusi karon sa NBI kon turista o may working permit dinhi ang mga nasikop nga Koreano ug uban pang detalye sa ilang pagpuyo dinhi sa Sugbo.

Susihon pa usab sa ahensiya kon dunay Pinoy nga nagtabang kanila sa ilang operasyon.

Kasong kalapasan sa Anti-Cybercrime Law ug illegal gambling ang gi-andam sa NBI batok sa mga dinakpan.