Lima ka mga lumolupyo sa Guihulngan City, Negros Oriental nga gipangdudahang mga asset sa militar sunodsunod nga gipatay sa managlahing mga dapit ug oras sa Biyernes sa buntag, Mayo 14, 2021.

Gipangdudahang mga sakop sa liquidation squad sa mga rebeldeng New People’s Army (NPA) ang killers.

Unang insidente nahitabo alas 5 sa kaadlawon sa Barangay Trinidad, diin ang biktima giila nga si Rogelio Fat, 45, kinsa gipusil sa upat ka wala mailhing kalalakin-an.

Pagka alas 5:30 sa sitio Budlasan, Barangay Trinidad gihapon, gipatay ang magtiayong Rodrigo Lubay, 48, ug Cerelina, 44. Upat gihapon ka mga lalake ang mga killer.

Pila ka minutos lang ang milabay, aduna na usay gipusil sa sitio Agit sa maong barangay, kinsa giilang si Ronilo Quirante Sr., 56, usa ka mag-uuma.

Pagka alas 11 sa buntag usa na usab, gipusil patay sa sitio Tangkulong, Barangay Linantuyan ang biktima nga si Jing Navarra, usa usab ka mag uuma.

Matod ni Police Senior Master Sergeant Anito Labrador sa Guihulngan police station, nagpadayon pa sila sa ilang imbestigasyon kon kinsa ang killers.

Alas 6 sa buntag, nakadawat og tawag ang kapulisan sa Guihulngan gikan kang kapitan Luciana Montecino sa barangay Trinidad labot sa nahitabo sa iyang dapit.

Dali nga ningresponde ang mga imbestigador ug ilang nasuta nga upat ka mga mag-uuma ang gipamusil. / AYB