ORMOC CITY- Lima ka mga lalake nasikop sa anti-illegal drugs operation sa Philippine Drug Enforcement Agency (PDEA) Leyte, kapulisan ug Center Against Illegal Drugs (CAID) sa Philippine Army sa Brgy. Tabgas, Albuera, Leyte, pasado alas 10 sa gabii, Miyerkules, Nobiyembre 10.

Ang lima mao sila si Dante Alao, Neil Magdadaro, Mario Mandras, Mervin Mandras ug Marlon Mandras.

Si Alao ug Magdadaro ang nag-atiman sa drug den samtang ang tulo ka Mandras pulos mga bisita.

Matod sa PDEA, una nilang gipahigayon ang usa ka buy-bust operation diin nakapalit ang ilang asset og shabu.

Gisunod nila ang pagpuhag sa drug den diin nadakpan ang duha nga nag-atiman nga si Alao ug Magdadaro.

Dugang pa sa PDEA, taudtaod na nilang gipanid-an ang illegal nga kalihukan tungod sa mga sumbong nga ilang madawat.

Nakuha sa PDEA ang 15 gramos nga gituohang shabu nga balor P102,000.

Gipaubos sa qualitative ug quantitative test ang mga nakuhang shabu samtang gipasaka na ang kaso abtok sa lima ka dinakpan.