NIABOT na Huwebes alas 9 sa gabii sa Dakbayan sa Sugbo ang 60 ka mga tinun-an sa Southwestern University-Phinma gikan sa Dakbayan sa Tagbilaran human sa dul-an tulo ka buwan nga na-stranded sa Lalawigan sa Bohol.

Ang mga tinun-an nag on-the-job (OJT) training sugod sa Pebrero 1, 2020, sa Gov. Celestino Gallares Memorial Hospital sa Dakbayan sa Tagbilaran, apan naputol tungod sa quarantine taliwa sa hulga sa coronavirus disease (Covid-19).

Matod ni Lorie Soldevilla, usa sa mga medical student ug nag OJT, nga molanat unta hangtod sa Mayo ang ilang pag-alagad sa ospital, apan naputol tungod sa pandemic.

Niundang sila sa OJT sugod sa Marso 18, apan nigasto ang unibersidad sa ilang pagkaon ug gipuy-an.

Ang unibersidad usab ang ni-coordinate sa local nga kagamhanan sa Bohol alang sa ilang pag-uli sa Sugbo.

Matod sa tigpamaba sa Philippine Coast Guard (PCG 7), Lieutenant Junior Grade Eric Salcedo, kompleto ang mga tinun-an sa medical certificate gikan sa mga awtoridad sa panglawas sa Bohol.

Ang mga tinun-an gipailawom sa nasal pharyngeal swab sa Bohol aron pagsuta nga wa silay Covid sa pag-uli. Silang tanan negatibo sa novel coronavirus, kagaw nga nagdala sa Covid-19.

Sakay sa Lite Ferry 6, nigikan ang barko mga alas 4 sa hapon sa Huwebes sa Tagbilaran ug nidunggo mga alas 9 sa gabii sa Pier 1 sa Dakbayan sa Sugbo.

Gisugat sila sa unibersidad og mga bus ug van alang sa laing hugna sa quarantine. (BBT)