Mokabat sa 69 pa ka mga lumolupyo sa Baybay City, Leyte ang missing human niigo ang mga landslide ug baha atol sa pagkuso-kuso sa bagyong Agaton sa miaging semana.

Sa samang update sa Abril 18, ang Baybay City Disaster Risk Reduction and Management Office niingon nga mokabat sa 120 ang patay nga nakuha na.

Ang labing daghan niini nagagikan sa Barangay Kantagnos nga dunay 59, ang 32 ka mga lawas wa pa mailhi ug matino ang gender, babaye ba o lalaki.

Gisundan usab kini sa Brgy. Mailhi diin 22 ang patay samtang 17 usab sa Brgy. Bunga.

Gikan sa 3,652 ka mga pamilya nga namakwit, mokabat na lang sa 707 ang nagpabilin sa mga evacuation center sa Abril 18, 2022.

Matod sa CDRRMO nga nangkutat na ang baha sa kasapaan nga nisuyla atol sa bagyo, apan ang local government unit (LGU) nagpahimangno una sa publiko sa di pag-adto sa mga dapit nga naigo sa landslide ug baha kay kuyaw pa kaayo.

Nahibalik na sab sa hingpit ang kuryente sa siyudad, apan dunay pagkaputol sa water supply, matod sa update sa buhatan.

Nagpadayon ang search and retrieval sa mga missing nga gipahigayon sa Bureau of Fire Protection (BFP), Philippine Army, Philippine Coast Guard (PCG), Philippine National Police (PNP), Philippine Navy ug pribadong mga rescue group gikan sa nagkadaiyang mga dapit sa Leyte.

Matod sa LGU nga 12 sa nangamatay sa dakbayan gilubong niadtong Dominggo, Abril 17, atol sa kasaulogan sa Pasko sa Pagkabanhaw.

Ang mga lawas gilubong sa Immaculada Conception Gardens sa Brgy. Guenavista.

Ang Baybay City usa sa mga dapit sa Eastern Visayas nga naapektuhan og maayo sa bagyong Agaton.

Nanginahanglan ang LGU og tabang alang sa ilang mga lumolupyo tungod sa kalapad ug kadako sa kadaut nga nahiaguman sa siyudad.

Laing naapektuhan og maayo mao ang lungsod sa Abuyog nga mga usa ka oras kon biyahion gikan sa Baybay City.