PITO ka mga personnel sa City Traffic Management System CTMS sa dakbayan sa Lapu-Lapu ang nag-positibo sa paggamit og ginadiling drugas atol sa gipahigayong kinalit nga drug test niadtong Lunes sa City of Lapu-Lapu Office of Substance Abuse and Prevention (C-Losap).

Gawas sa pito adunay laing usa nga giingong niuli atol sa gipahigayong drug test human nga nibalibad kini nga makuhaan og urine sample. Matod pa nga ang maong personnel sa C-Losap ang namalihug nga maoy mohatag pg urine sample alang kaniya sa wala pa kini mopauli.

Gitagaan kini ug kahigayonan nga makabalik apan wala gayud kini mopakita hinungdan nga makonsiderar na usab siya nga tiggamitan og ginadiling drugas.

Aduna usay duha ka personnel nga gikatakdang ipaubos usab ug laing drug test sa umaabot sanglit absent kini niadtong Lunes.

Pagkataktak sa serbisyo ang mando karon ni Lapu-Lapu City Mayor Junard ”Ahong” Chan sa mga nag positibo sa drug test. Apan huwaton gihapon sa mayor ang confirmatory test niini.

Tagaan usab kini og opsyon ni Chan nga magpaubos sa rehabilitasyon sa buhatan sa C-Losap o ba kaha sa barangay based rehabilitation.

“Kini unta dako na kaayo ning kahigayonan nga gihatag nato kanilang panarabaho para sa ilang pamilya, apan ila lang nga gisayangan, nga opportunity na unta kaayo ni nila,” pagpasabot ni Chan.

Nasayran nga si Chan mao gayud ang ni-request sa C-Losap nga ipaubos sa drug test ang mga personnel sa CTMS.

Buot usab ni Chan nga taas ang panglantaw sa publiko sa CTMS hinungdan nga gipaubos sila sa drug test.

“Kung tiggamitan man gud dili sakto ang pangutok, anha mosud ang pagpangotong, kung ikaw maggamitan mangita ka’g kwarta mangita ka’g paagi like what happened sa milabay nga dunay former traffic enforcer nga gigamit ang citation alang sa pagpangwarta. So naa diha ang prone sa pagpangwarta,” saysay ni Chan. (GCM)