DILI mominos pito ka mga tindahan ang naugdaw sa sunog nga niigo sa Barangay Poblacion, lungsod sa Baril, ala una sa kaadlawon kagahapon, Pebrero 28, 2022.

Si SFO2 Nico Medes Baisac nga nahinabi sa Superbalita Cebu nagkanayon nga ang sunog giisa sa 1st alarm ug nakontrolar sa alas 2:20 sa kaadlawon ug gideklarar nga fire out sa alas 5:34 sa buntag.

Sumala ni Baisac, ang pito ka mga tindahan ginama sa lights materials nga naglangkob sa ukay-ukayan, pharmacy, photo shop, ug bakery.

Tulo ka firetrucks sa Barili ug usa sa Dumanjug ang nagtinabangay sa pagpawong sa kayo.

Atol sa pag-ulbo sa sunog, brownout o walay kuryente sa dapit apan, atol sa pagkuha ning taho, susihon pa sa kabomberohan ang sinugdanan sa kayo.

Dugang ni Baisac, ang sunog nagbilin og danyos nga P550,000.