DI MOMINOS sa 70 ka mga balay ang nalamoy sa sunog sa Sitio Huyong-Huyong ug Sitio Pungtod, Barangay Mambaling, Cebu City alas 2 sa hapon sa Biyernes, Mayo 31.

Base sa report nga nadawat sa opisina sa Bureau of Fire Protection (BFP) sa Pahina Central, nagsugod ang kayo sa ikaduhang andana sa panimalay sa gihinganlan og Hydee ug Josephine Amora.

Di mominos og P1.2 milyones ang danyos sa sunog, matod ni SFO1 Marichel Caburnay, telephone operator.

Tibuok fire stations sa siyudad sa Sugbo ug barangay fire volunteers ang niresponde sa sunog.

Gisaka sa second alarm ang sunog mga alas 2:27 sa hapon, ug third alarm sa alas 2:35, ug gideklarar nga undercontrol mga alas 3:42 sa hapon, matod ni Caburnay.

Sa pagkutlo ning balita, nag fire overhauling pa ang kabomberohan samtang under investigation pa ang hinungdan. (JJL)