NIABOT og 128 ka lainlaing mga sakyanan ang gi-clamp ug gi-isyohan og traffic citation tickets sa Cebu City Transportation Office (CCTO) atol sa ilang duha ka adlaw nga massive clamping operation.

Si retired police Major Andres Bayarcal, operations chief sa CCTO, nagkanayon nga niadtong Agusto 29, naka-clamp sila og 32 ka mga sakyanan kay nag-overnight parking. Kini kalapasan sa City Ordinance 1657.

Kagahapon, Agusto 30, laing 41 ka mga sakyanan, lakip na ang usa ka trailer, ang ilang gi-clamp. Laing 40 ang naisyohan og citation tickets.

Lakip sa mga lugar nga girumbo mao ang Barangay Hipodromo, Fuente Osmeña, Sambag 2, San Antonio, V. Rama, C. Padilla, downtown area, Sawang Calero, Pasil, midtwon ug uptown areas.

Si Ronnie Nadera sa CCTO nagkanayon nga gawas sa mga na-clamp, ang mga motorista nga naisyohan og citation tickets mao kadtong nakalapas sa disregarding traffic signs (DTS) sama sa no stopping, no left turn ug no parking.

Ang mga sakyanan nga giparada sa national highway, sidewalks ug kadtong giparada duol sa mga eskina o intersection maoy ilang gipang-isyohan ug gipang-clamp. (PAC, BTT)