Wa makadawat og bakuna ang mga tawo nga nangamatay sa coronavirus disease (Covid)-19 sa unang tulo ka adlaw sa Agusto sa dakbayan sa Sugbo.

Kini ang gipahibawo ni Cebu City north district Councilor Joel Garganera, deputy chief implementer sa Emergency Operations Center (EOC).

Si Garganera nagkanayon nga sa unang tulo ka adlaw sa Agusto, walo ka mga tawo ang nakalas, pulos wa makabakunahi batok sa Covid-19.

Ang record sa Department of Health (DOH)-7, nagkanayon nga 11 ang patay sa Covid-19 niadtong Agusto 1.

Apan matod ni Garganera nga kining 11 wa mamatay sa mao nga adlaw, kon di sa hinapos pa nga semana sa Hulyo.

Nalangan lang ang pag-abot sa ilang death certificates.

Mao sab kini ang nahitabo sa Agusto 2, diin siyam ang lista sa DOH.

Apan matod ni Garganera nga usa ra ang namatay niadtong Agusto 1, ang walo niadto gihapong Hulyo.

Samtang sa 11 nga natala sa DOH sa Agusto 3, upat ra niini ang namatay sa mao nga adlaw kay ang pito, niadto lang gihapong walo.

Si Garganera nagkanayon nga dako og ikatabang ang vaccine batok sa Covid-19 base sa nahitabo sa 100 ka frontliners sa nilabay nga 10 ka adlaw.

“Of the 132 fully-vaccinated medical frontliners in Metro Cebu who acquired Covid-19, 95% are either asymptomatic or had mild effects,” padayag ni Garganera.

82 ANG PATAY

Sa Hulyo, ang EOC nakalista og 82 ka patay gumikan sa Covid-19 sanglit napuno ang mga patay mga gilista sa DOH sa Agusto 1 ngadto sa 3./PAC

Ang Cebu City adunay 210 nga aktibong mga kaso niadtong Agusto 3 samtang 163 ka mga tawo ang hingpit nga naka-recover.

Sa kinatibuk-an, niabot na og 968 ka mga tawo ang nangamatay gumikan sa Covid-19 samtang niabot na og 30,441 ka mga kompirmadong kaso sukad sa pag-igo sa Covid-19. Sa pagkakaron, ang Cebu City dunay 2,681 ka aktibong mga kaso.

Si Dr. Jeffrey Ibones, pangulo sa City Health Department, nagkanayon nga niabot na og 122, 693 ka mga tawo ang nabakunahan.

Ang 80,939 nakumpleto na sa ilang second dose gikan sa 252,489 ka mga tawo nga nagparehistro sa pabakunata.com sa Cebu City Government. (PAC)