Moabot sa 85 litros sa gasolina samtang 45 nga litro sa krudo ang naimbargo sa mga operatiba sa Regional Intelligence Division (RID)-7 ug Department of Energy (DOE)-7 atol sa ilang pag inspeksyon sa mga gasolinahan sa dakbayan sa Lapu-lapu.

Matod ni Police Colonel Glenn Mayam, pangu sa RID-7, kini ilang gibuhat aron malikayan ang pagpahimulos sa kadtong namaligya og gasolina nga mas mahal nga mosabay usab sa panahon nga nagkalisod ang katawhan.

Sa ilang pag inspeksiyon sa kapulisan ug mga personnel sa DOE-7, dunay na abtan niini nga mga gasolinahan nga namaligya og mas taas ang presyo sa gasolina ug krudo.

Matud ni Mayam nga ang grupo ni Police Major Joffre Grande naka embargo og moabot na sa 70 ka litro sa gasolina.

Samtang ang grupo ni Police Captain Joseph Aquino naka embargo usab og 30 litro sa krudo ug 15 litro sa gasolina sa duha ka mga batan-on nga na abtan nga namaligya sa Barangay Bangkal, dakbayan sa Lapu-lapu.

Giposasan usab kining duha nga namaligya nga sila si Alexander Turceno, 39, lumad nga taga lungsod sa Tudela sa isla sa Camotes ug Dee Mark Mondejar, 25, ug molopyo sa Barangay Bangkal sa nahisgutang siyudad.

Gibanabana nga moabot sa dul-an P15,000 ang kantidad sa mga naimbargo nga gasolina gikan sa duha ka managlahi nga mga operasyon sa pagpanakop.

Dugang ni Mayam nga ang maong operasyon subay sa kalapasan sa EO 2021-076. Ang duha nga nadakpan ana-a na karon gitanggong sa selda sa RID-7.