SIYAM ka mga tawo, duha kanila mga menor de edad nga mga taga Barangay Suba ug Pasil, nadakpan sa paglapas sa curfew ordinance sa Dakbayan sa sugbo.

Matod ni Police Major Eduard Sanchez, hepe sa Sawang Calero Police Station, way hunong ang ilang pagpangdakop sa mga tawo nga anaa gihapon naglatagaw sa karsada lapas sa alas 11 sa gabii.

Ang curfew magsugod sa alas 11 sa gabii hangtod sa alas 5 sa buntag.

Dugang ni Sanchez nga ang Barangay Suba ug Pasil maoy ilang gitutokan karon sa pagpatrolya kauban ang kasundalohan sa Central Command (Centcom) nga maoy nagdala og armored personnel carrier (APC) ug trak.

Ang siyam gidala sa Barangay Labangon gym aron kuhaon ang ngalan ug gipaubos sa seminar una palimpuyohon.

Samtang ang duha ka mga menor de edad lima ka oras nga magpundo sa gym una pa ipatawag ang mga ginikanan. (BBT)