Nangalisang ang mga residente human ang atop sa ilang mga panimalay gipanglarot sa kusog kaayong alimpus nga niigo sa alas 2:30 sa hapon kagahapon, Agusto 5, 2022.

Ang giharos sa alimpus mao ang bukirang dapit sa Sitio Campo, Barangay Tubod-Dugoan, lungsod sa Dumanjug, habagatang-kasadpan sa lalawigan sa Sugbo.

Ang alimpus nagtuyok nga hangin nga giuban sa pag-uwan-uwan dihang giharos ang tulo ka mga balay nga ginama sa light materials.

Si Police Staff Sgt. Merlo Dapat sa Dumanjug Police Station nga nahinabi sa Superbalita Cebu, nagkanayon nga daling gipadala ang ilang personnel sa lugar uban sa mga sakop sa Emergency Response Team ug mga personnel sa Municipal Disaster Risk Reduction Management Office (MDRRMO).

Ang maong dapit dunay gilay-on nga kapin sa 10 kilometros gikan sa kinapusoran nga Barangay Poblacion.

Si Police Master Sgt. Romeo Legaspi Jr. sa Dumanjug Police Station nagkanayon nga gabii na nabalik ilang team nga nagsusi sa dapit.

Gipadayag niini nga giayo gyud sa pagkuso-kuso sa kusog nga alimpus ang mga panimalay hinungdan nga nangaguba kini.

Ang mga residente sa dapit nipadayag nga moabot sa 15 minutos ang pagkuso-kuso sa alimpus ingon man dungan sab sa pag-uwan nga gikalisang sa mga residente.

“Panic sila nagdinaganay, ang uban tagbalay nitago kutob sa mahimo, ngadto sa suok aron dili maapil pag-alsa sa alimpus,” dugang ni Legaspi sa Superbalita Cebu.

Hinuon, walay bisan usa nga naangol sa alimpus gawas sa mga balay nga nangaguba.

Sumala sa mga residente, na-trauma sila sa panghitabo ug nagtuo nga katapusan na sa ilang kinabuhi tungod sa kakusog sa pagtuyok sa hangin nga dalang uwan.

Usa ka Angelyn Mama Alogado, residente sa lugar, nipadayag sa iyang post sa Facebook nga nagkurog siya dihang nagkuha sa mga hulagway sa pagkuso-kuso sa alimpus.

Sumala niya nga gipang-alsa ang mga atop sa iyang mga silingan nga nangalabay sa lagyong lugar.

Ang awtoridad nipasidaan sa publiko tungod sa padayong dili maayong panahon.