SA IYANG kapungot nga wa manumbaling sa iyang sugo nga manghugas sa mga tiil, gilapwaan sa 28 anyos nga inahan ang iyang 9 anyos nga anak nga lalake.

Di pa igo, iya kining gipaak sa dunggan sulod sa ilang balay niadtong Biyernes sa alas 5:30 sa hapon, Enero 22, 2021 sa Barangay Langtad, lungsod sa Argao, habagatang Sugbo.

Si Captain Jeremie Shiela Gurtiza, hepe sa Argao Police Station nga nahinabi sa Superbalita Cebu, nagkanayon nga ang mama miangkon sa iyang salaod nga nahimo dihang gi-turnover sa mga barangay official nga maoy gidangpan sa anak.

Matod ni Gurtiza nga niasoy si Mercy (di tinuod niyang ngan) nga iyang gimandoan ang iyang anak nga nga manghugas sa mga tiil aron malimpiyohan ang samad o nuka kay iyang tambalan.

Siya niingon nga wa magtagad ang bata sa iyang sugo kay na busy sa duwa hinungdan nga siya nasuko.

Sa iyang kalagot kay nagpalingal-linga, unya nagbantay pa siya 2 anyos nga manghod nga lalake, nikuha siyag init tubig sa kaldirin ug giyab-an ang dughan sa iyang anak.

Bisan pag nagping-it sa kasakit ang bata, wa pa siya matagbaw, iyang gipaak ang dunggan sa iyang anak.

Human niini, nikaratil pagdagan ang anak ngadto sa barangay hall.

Dihang si Mercy niapas, gidakop siya mga barangay official ug mga tanod tungod sa sumbong sa bata.

Si Mercy naghilak nga niangkon sa iyang kasaypanan.

Siya nipasabot nga gusto lang unta siya nga butangan og hot compress ang nuka sa tiil sa bata.

Nasuta sab nga ang amahan sa bata wala niadtong higayuna kay namasahero sa tricycle.

‘Nakalitan daw siya kay nagpabadlong, napunit niya ang kaldirin giyabo sa dughan. Pero grabing pagmahay, nangayog pasaylo sa iyang anak,” dugang ni Gurtiza.

Ang bata nitug-an kanila nga makadaghan na siya dagmali sa iyang inahan. Di lang sab kausa ra kahigayon siya gipaak niini kon saputon.

Dagmalan sab siya kon di makatubag sa module pinaagi sa pagbunal, kusi ug paak.

Matod ni Gurtiza nga posibleng dunay post partum nga sakit ang inahan kay lain na ang sinultihan niini.

Nagtuo siyang naapektuhan ang pangisip ni Mercy sa kamatayon sa iyang anak niadtong Hunyo.

Nasuta nila nga nausab ang dagan sa hunahuna sa mama dihang namatay iyang anak sa pagpanganak niadtong Hunyo sa miaging tuig.

Bisan pa niini, ipasaka gihapon nila ang kasong child abuse batok kang Mercy ug ang hukmanan na ang mohukom.

Si Mercy, sa pagsuwat ning taho, naa pa sa prisohan.