Ormoc City - Kahadlokan paminawon ang iyang angga o alyas apan usa ka matinud-anon ug modelo nga drayber sa tricycle sa dakbayan sa Ormoc.

Si Aladin Luchavez o nailhan sa uban nga ‘Kuya Manyakis’, tricycle driver, niuli sa usa ka pouch o pitaka nga gipanag-iya sa usa ka healthcare worker sa Gatchalian Hospital nga si Hanzel Manatad.

Matod ni Hanzel sa iyang post, “Thank you so much kuya Aladin Florendo Luchavez aka ‘Kuya Manyakis’ pero maayo kaayog kasingkasing. Salamat, kuya sa pag-uli sa akong pouch nga naa jud importante nga mga gamit.”

Gihatagan ni Mayor Richard Gomez og reward ang drayber tungod sa pagkamatinud-anon.

“Mas maayo daghan pa nga mga driver ang pareha nimo ug dapat ato ipakita nga kita diri sa Ormoc, mga matinud-anon,” matod ni Mayor Gomez atol sa pagtunol sa ganti.

Bisan sa pagka tricycle driver, gisaad ni Luchavez nga pabilin siya nga matinud-anon.

“Ako, sir, bisan tricycle driver ko pero mao ra ni ako gipasigarbo nako sa akong mga anak nga matinud-anon ko ug nagtarong sa akong kinabuhi,” matod ni Luchavez.

Kauban ni Mayor Gomez sa paghatag sa reward si City Councilor Goito Yrastorza ug Barnsby Cagang. (JKDP)