ORMOC, Leyte - Si City Councilor Lalaine Marcos ning dakbayan buot pakusgan ang kampanya batok sa sexual harassment sa trabahoan.

Si Marcos miatubang sa mga lalake nga kawani sa lokal nga kagamhanan sa Ormoc atol sa gipahigayon nga Kalalakin-an Tapat sa Responsibilidad at Obligasyon sa Pamilya (KATROPA) sa Multi-Purpose Hall.

Ang aktibidad gipasiugdahan sa Intergrated Population and Gender Development Office (IPGDO) sa ilang 18 ka adlaw nga kampanya batok sa Violence Against Women and Children (VAWC).

Sa iyang pakig-atubang, gipalanog ni Marcos nga buot niya ipaapil sa IPGDO ang kabahin sa Anti Sexual Harassment in the Workplace.

“Ako gihangyo ang IPGDO nga sa sunod pahimuslan nato nga ato isulod ang anti sexual harassment in the workplace hilabi na kay mga empleyado mo,” matod ni Marcos.

Dugang ni Marcos nga importante nga masayod ang matag kawani sa mga di maayo ug law-ay nga lihok hilabi na sulod sa opisina.

“Usahay man gud nga kon naa ta sa opisina, close na. Murag sayon sayon lang sa uban lalake nga kuhit kuhit, hikap hikap sa tuhod handtud saka sa paa,” matod ni Marcos.

Hugot nipahimangno si Marcos sa mga kawani nga likayan ang maong binuhatan kay mamahimo kini nga basehan sa pagtaktak sa trabaho ug mas grabe pa kon di na makasud og trabaho sa gobyerno.

Hangyo ni Marcos, kinsa chairman sa committee on women and children sa Konseho, nga magrespitaray lang sa trabaho ingon man ngadto sa panimalay. (JKDP)