NAGSUGOD na og panawat og mga aplikasyon ang Public Employment Service Office (Peso) sa kagamhanan sa lalawigan sa Sugbo gikan sa mga ninggradwar sa senior high school sa mga publikong tunghaan sa kalungsoran ug mga dakbayan sa lalawigan nga may highest ug high honors.

Si Julius Chua, labor and employment officer sa Peso sa Kapitolyo, niingon ang mga kabos apan utokan ug angayan nga gradwado, maoy dawaton sa scholarship.

Gawas sa libreng tuition, makadawat usab og binuwan nga allowances ang madawat nga mga eskolar.

Kon kini nigradwar nga dunay highest honor, P2,000 ang binuwan nga allowance nga madawat gikan sa Kapitolyo samtang P1,500 kon with high honors.

Sigon ni Chua bisan unsa nga kurso nga itanyag sa Cebu Normal University ug Cebu Technological University ang pilion sa mga eskolar.

Alang sa gusto mo-apply, kinahanglan nga magdala kini og certificate of good moral character, card, ug certificate nga pirmado sa principal diin siya nigradwar nga magmtuod nga siya nitapos og Grade 12 nga dunay highest honor o high honor.

Gikinahanglan usab ang Income Tax Return (ITR) nga magpakita nga ang hiniusang kita sa mga ginikanan kay di molapas sa P100,000 matag tuig o certification gikan sa Bureau of Internal Revenue (BIR) bahin sa Tax Payment Exemption. (SCG)