CATBALOGAN CITY, Samar - Duha ang nasikop sa drug bust operation sa dakbayan sa Catbalogan sa Samar. Usa niini ang sakop sa Philippine Army.

Giila ang mga suspek nga sila Agapito Antonio, 32, army, taga Banawag, Pres. Quirino, Sultan Kudarat.

Samtang usa mao si Ronnel Acera, taga Barangay Maulong, Catbalogan City, Samar.

Matod sa Philippine Drug Enforcement Agency (PDEA) 8, nalakip si Antonio sa high value target gumikan sa iyang pagka sakop sa law enforcement group.

Taud taud na gipanid-an sa kapulisan sa Catbalogan ang ilegal nga kalihukan.

Human sa pipila ka test buy, nakompirmar ang report nga ilang nadawat.

Alas 7 sa gabie, Pebrero 24, Dominggo, nihimo sa ilang buy bust operation ang kapulisan uban sa PDEA8 ug militar sa Purok 2, Brgy. Maulong.

Usa ka poseur buyer ang nipalit ug nagpositibo ang ilang tuyo.

Wa na makapalag ang mga dinakpan kahuman dali nga napalibutan sa mga operatiba.

Nakuha sa maong operasyon ang tulo ka pakete sa gituhoang shabu nga dunay timbang nga 0.21 gramos.

Dunay kantidad nga P1,500.

Kasong kalapasan sa Republic Act 9165 o Comprehensive Dangerous Drugs Act ang atubangon sa duha ka suspek.