GATUSAN ka mga artist sa nagkadaiyang parte sa nasod ang anaa karon sa Sugbo alang sa fundraising event diin tumong matabangan ang lokal nga mga artist, biktima sa linog sa Mindanao, ug bagyong Tisoy.

Ang ArTabang nga gimugna sa Sacred Heart School for Boys - Batch 85 Foundation, mopahigayon sa ArTabang 3 karong Sabado, Disyembre 8.

Mao kini ang ikatulong higayon nga himuon ang ArTabang diin unang gihimo niadtong 2013 alang sa pagtabang sa mga local artists ug mga biktima sa bagyong Yolanda.

Karong tuiga mao ang ikatulong higayon diin pagahimuon kini sa 12th floor, Oakridge IT Center 3 Building, Oakridge Business Park, A.S. Fortuna, Dakbayan sa Mandaue. Gawas sa kapin sa 200 ka mga painting nga i-exhibit, aduna’y 30 ka mga dagko nga collaboration paintings ang ipaubos sa silent auction sugod alas 7 sa gabii hangtod alas 10:30 sa gabii. (HBL)