Balita

Ayuman gitudlong assistant secretary sa DSWD

Philip A. Cerojano

Kon naanad ka nga motawag ni kanhi Apas barangay Captain Ramil Ayuman og Kap Ramil, karon mahimo na kana nimong usbon og Asec Ramil.

Kini human gitudlo siya ni Presidente Rodrigo Duterte isip Assistant Secretary (ASec) sa Department of Social Welfare and Development (DSWD) aron maoy motutok sa Regions 6,7 ug 8.

Si Undersecretary Jonji Gonzales sa Office of the Presidential Assistant for the Visayas (OPAV) nianunsyo niini pinaagi sa iyang social media account.

“Congratulations, Asec Ramil Villena Ayuman,” post ni Gonzales ug maoy gibasehan usab sa congratulatory messages sa mga higala ni Ayuman nga gi-post sa social media.

Sa interbyu sa Superbalita Cebu, si Ayuman nagkanayon nga nakadawat siya og tawag gikan ni DSWD Usec. Aimee Torrefranca-Neri kinsa maoy nagpahibawo kaniya kabahin sa iyang appointment.

Matod pa ni Ayuman ang iyang appointment isip opisyal sa DSWD usa ka dakong hagit alang kaniya sanglit kini maoy labing dako niya nga tahas sa iyang pagpanerbisyo sa publiko.

Giklaro sa kanhi barangay chief sa Apas nga dili lang ang Cebu city o Cebu ang iyang tutokan, kon dili ang tanang lalawigan ug siyudad sa tulo ka rehiyon nga nanginahanglan og tabang gikan sa DSWD.

Si Ayuman kanhi reporter sa ABS-CBN Cebu ug nahimong barangay kagawad hangtod nahimong kapitan sulod sa tulo ka termino ug nibalik pagka-konsehal niadtong 2018.

Apan wala na siya motiwas sa iyang fresh term isip barangay councilor sanglit niadtong 2020, gitudlo siya ni anhing Mayor Edgardo Labella aron maoy mangulo sa Cebu City Disaster Risk Reduction and Management Office hangtod natudlo sa posisyon niya karon.

Kagahapon, si Ayuman nakighimamat sa iyang mga personnel sa CCDRRMO, kansang turnover ipahigayon sa Huwebes, Enero 20 kauban ang iyang successor nga si retired Bureau of Fire Protection (BFP) General Aderson Comar sa social hall sa Legislative Building sa Cebu City Hall.

CEBU. Cebu City Mayor Mike Rama.

Rama: Let LGUs set up own water district

Deforestation in Cebu City ‘continues’

Pagasa: It will be a hot CVIRAA week

Over 4K megawatts to boost power supply in 2024

Study shows 'degrading state' of marine life in PH’s Sandy Cay