USA ka 21 anyos nanganak sa karsada sa Barangay Lagtang, Dakbayan sa Talisay sa alas 6:41 sa buntag sa Martes, Oktubre 19. 2021.

Giila ni City of Talisay Traffic Operations and Development Authority (CT-TODA) head Jonathan ang babaye nga si Mae Bacus Branzula,dunay kapuyo, taga Purok Panas, Barangay Lagtang.

Matod ni Tumulak nga kuyog ni Branzula ang iyang kapuyo nga si Cemel Cabriana ug inahan niini, nga naglakaw padulong sa Cebu South Medical Center, kanhi Talisay District Hospital, aron adto unta manganak.

Si Branzula niana pang kaadlawon sa Martes nagbati.

Kay di na man niya makaya ang pagpugong samtang naglakaw nga nagbati, nanganak na lang si Branzula sa daplin sa karsada.

Usa ka concerned citizen ang nipahibawo sa traffic enforcer nga dunay nanganak daplin sa karsada.

Daling gipahibawo ang Talisay Response Emergency Action Team (Treat) nga dali usab nga nakapadala og ambulansya.

Gidala sila si Branzula ug ang masuso nga babaye nga una nilang anak ni Cabriana.

Sa pagsuwat ning taho, naa sa luwas nga kahimtang ang inahan ug anak sulod sa CSMC. (REV)