ROSARIO, Northern Samar - Babaye nga gidudahang gilugos ug gipatay napalgan sa usa ka kanal daplin sa karsada nga sakop sa Barangay Salhag ning lungsod.

Ang lawas nakit-an alas 6 pasado sa buntag, Miyerkules, Mayo 22, 2019.

Ang biktima giila sa kabanay nga si Ellen Joy De Guia, 26, taga Barangay Dalakit, Catarman, Northern Samar, nagtrabaho isip call center agent.

Ang biktima dunay usa ka 7 anyos nga anak.

Giingong nibakasyon sa ilaha ang biktima aron usab mobotar sa 2019 elections.

Pagsusi sa kapulisan, ilang nakit-an si De Guia nga patay na ug nagkadugo ang ulo.

Nakapaduda sa mga tawo nga posibleng gilugos si De Guia una pa patya kay naubos na ang shorts ug underwear sa may tuhod.

Sa pagsusi, nakaangkon og daghang bun-og ug samad sa ulo niini nga miresulta sa kamatayon. Hustisya ang panawagan sa pamilyang De Guia sa brutal niining kamatayon.

Gisiguro sa kapulisan nga mohimo sila og lawom nga imbestigasyon. (JKDP)