DILI kaso sa saag nga bala kundi intensyonal nga pagpusil ang nahitabo sa usa ka babaye atol sa pagsugat sa Bag-ong Tuig sa Sitio Lower Mohon, Dakbayan sa Talisay kaniadtong Huwebes, Enero 1, 2020.

Kini sukwahi sa gipagawas nga initial report sa Regional Epidemiology Surveillance Unit (Resu) Central Visayas.

Giklaro sa hepe sa kapulisan sa Talisay City Police Station Major Gerard Ace Pelare nga usa sa mga gitumbok nga responsable sa pagpamusil ang nasikop nila usa ka adlaw human sa panghitabo.

Matod ni Pelare nga usa ka Mitchell Parot Heruela, 19, taga Sitio Lower Mohon, Dakbayan sa Talisay ang napusilan sa walang tiil alas 12:05 sa kadlawon.

Kini samtang ang biktima uban ang iyang mga kabanay nga anaa sa gawas sa ilang panimay samtang nagtan-aw sa fireworks display.

“As far as we are concerned, there is no stray bullet incident in Talisay because during the investigation, we have gathered witnesses who testified that the shooting was really intentional," pagpasabot ni Pelare.

"In fact, when the doctor examined the wound of the victim, ang entrance ug exit sa wounds are of the same level. That would tell us that the shooter is in a parallel position with the victim and the firearm was in parallel position with the victim,” dugang ni Pelare.

Sa gihimo nga pakisusi nasuta nga dili si Heruela ang target sa mamumuno kundi an ig-agaw niini nga si John Kaven Parot, kinsa tupad sa biktima atol sa pagpamusil.

Gitan-aw karon nga motibo sa pagpamusil mao ang pagpanimalos.

Aduna'y saksi ang kapulisan, kinsa nakatudlo sa usa ka ginganlan og Reymar ug kauban niini nga si Manny Cabrera, 34, taga Barangay San Roque, Dakbayan sa Talisay, nga maoy responsible sa pagpamusil.

Nasikop sa Cabrera Miyerkules sa gabii atol sa gihimo nga hot-pursuit operation ug nakuha gikan kaniya ang usa ka .38 kalibre nga armas ug upat ka bala.

Matod ni Pelare nga si Cabrera ug usa ka Reymar giingong sakop sa Kalmados Fraternity diha sa Dakbayan sa Talisay, kinsa aduna'y kasungian na kang Parot sukad pa niadtong 2017. (FMD)