TEMPORARYO nga gi-ban sa dakbayan sa Ormoc ang pagsulod sa mga baboy ug produktong baboy gikan sa bisan asang lugar sa Rehiyon 8 (Eastern Visayas) ug Mindanao.

Si Mayor Richard Gomez miluwat of kamanduan human ang silingang lungsod sa Abuyog, Leyte ang naigo sa African Swine Fever (ASF).

Gimando sa mayor nga ang tanan nga baboy ug produktong baboy dili una makasulod sa dakbayan sud sa 100 ka adlaw.

Buot sa mayor nga maprotektahan ang dakbayan sa ASF nga mopatay sa mga binuhing baboy.

Si Dr. Joseph Cortes, labaw sa City Veterinary Office, nagkanayon nga pwede lang dawaton sa dakbayan ang mga baboy ug produktong baboy gikan sa Western ug Central Visayas (Region 6 ug 7) pero dunay mga rekisitos nga kinahanglan sundon.

Giklaro ni Cortes nga ang nahisgutang mga lugar luwas sa ASF gumikan sa strikto usab nila nga mga patakaran.

Ang matag border sa dakbayan duna nay naka standby nga tinugyanan sa Department of Agriculture aron magbantay sa buot mopasulod og baboy sa Ormoc.

Giklaro usab ni Cortes nga bisan kadtong mga baboy nga i-agi lang sa Ormoc paingon sa laing lungsod dili gihapon pwede.

Gidili usab sa kagamhanan nga makagawas ang mga baboy gikan sa Ormoc paingon sa laing lugar aron masiguro nga di magkuwang ang supply sa sbaboy sa dakbayan.

Susihon usab sa kagamhanan ang mga manindahay sa gikataho nga pagsaka sa presyo sa karneng baboy.

Inspeksyunon usab sa syudad ang mga grocery store kung wala bay mga pork related products nga nakasud human giimposar ang Executive Order 133 sugod Enero 16, 2021. (JKDP)