Dugangan pa sa Cebu City Government ang artificial intelligence traffic light system nga adunay timer ug camera human nakumpleto ang pag-istalar sa P238 milyones nga balor sa proyekto.

Kini ang gisaad ni Mayor Edgardo Labella atol sa iyang pagpamulong dihang pormal nga gipaila-ila sa publiko ang maong proyekto nga maoy sinugdanan sa paghulip sa 31 ka tuig nang traffic lights sa dakbayan.

“Three decades and it is only now that we were able to improve our traffic light system. And there’s going to be additional artificial intelligence traffic light system in the city during our terms,” padayag ni Labella.

Gipasalamatan sa mayor ang City Council pinangulohan ni Bise Mayor Michael Rama kinsa maoy nag-aprobar sa iyang gipangayo nga proyekto para sa trapiko sa dakbayan.

Ang mayor subli nga nianunsyo nga aduna pay daghang proyekto nga matagamtaman ang mga Sugbuanon.

Sa miaging adlaw mao ang groundbreaking sa pag-redevelop sa Carbon Market, pagtiwas sa Cebu City Medical Center, pagpabarog sa mga condominium para sa mga kabos ug uban pa.

“We are now in the process of kausaban. As I said over and over again that Cebu City is work in progress,” ni Labella pa.

Samtang gi-blessing-an usab kagahapon ang upat ka equipment sa Cebu City Transportation Office nga maoy nag-ilis sa 27 anyos na nga boom truck, man lift truck ug towing truck. (PAC)