GIKATAKDANG masolusyonan na ang dugay nang suliran sa baha ug trapiko sa upat ka mfa barangay sa dakbayan sa Lapu-Lapu.

Kini human nga gigahinan og pundo ni Kongresista Paz Radaza sa dakbayan sa Lapu-Lapu nga mahimoan og road ug drainage project ang Basak-Cagudoy-Bankal-Buaya Road nga kanunay bahaan kon magbunok ang uwan.

Matod sa kongresista, moabot sa P46.4 milyunes ang naasoyng road ug drainage project nga gikatakdang mahuman sa Hunyo 6, 2021.

Gipangulohan sa kongresista ang ground breaking ceremony niadtong Nobiyembre 19 uban ang mga opisyal sa Department of Public Works and Highways (DPWH) 6th District Engineering Office.

“Ang flooding problem dili masulbad overnight. Mao nang akong gipaningkamotan nga mapadayon ang akong mga proyekto niini nga akong nasugdan sa panahon nga mayor pa ko,” matod ni Radaza.

Pagpasabot ni Radaza nauwahi ang pag-implementar sa proyekto gumikan sa availability sa pundo ug ubang prayoridad nga proyekto nunot niining nasinating pandemya.

Apan karon nga nasugdan na nanghinaot siya nga dili na kini madelatar.

Lakip usab sa iyang pagabantayan nga masigurong mahuman gilayon mao ang ubang proyekto sama sa Multi-Purpose Building, Road Safety ug Flood Control nga mga proyekto.

Gani aduna nay usa nga padayong gitrabaho sa Brgy.San Vicente isla sa Olango nga mao unyay magsilbing magamit panahon emergency ug ubang kalihukan sa barangay.

“Manghinaot ko nga kini balosan usab sa contractor pinaagi sa paspas nga pagtrabaho ani nga project,” matod ni Radaza sa Superbalita Cebu. (GCM)