Asawa gidunggab sa iyang bana gamit ang screwdriver sa makadaghang higayon sulod sa ilang balay sa Purok Bayabas 1, Barangay Bagacay, lungsod sa Sibonga, alas 9:30 sa gabii, niadtong Biyernes, Enero 21.

Ang biktima nga asawa mao si Ma. Belen Recapente Salimpot, 42, nakaangkon og daghang samad dinunggaban sa dughan ug iyang abaga.

Hangtod ning pagsuwat, wala na igkita ang bana nga si Norbert Maturan Salimpot, 43, taga Barangay Caipilan, dakbayan sa Carcar.

Ang biktima kasamtangang nagpaalim sa samad sulod sa usa ka ospital sa dakbayan sa Sugbo human sa grabeng samad “flat screwdriver nga gigamit sa suspek sa pagdunggab.

Si Police Master Sgt. Gerardo Abad sa Sibonga Police Station nga nahinabi sa Superbalita Cebu nagkanayon nga ang anak sa biktima nga 13 anyos nga lalake maoy nipahibalo sa maong hitabo.

Asoy sa anak ngadto sa mga pulis, ang iyang inahan natulog sa sala uban niya ug usa ka ig-agaw.

Ang 13 anyos nibutyag nga nakabantay siya dunay tawo nga nisaka sa balay human nayatakan ang tiil niini.

Apan pagsusi niya, ang iyang amahan diay ni nga nagbitbit sa mahait nga hinagiban ug walay lipudlipod nga nidunggan sa iyang inahan nga natulog niadtong higayona.

Dugang sa batan-ong anak, nisinggit siya sa pagpangayo og tabang sa mga silingan ug ang suspek nga amahan nidali sa pagdagan sa gawas ug wala madakpi.

“Basin gimingaw ni siya kay dili na makaduol. Naburyong kay makadaghan na gihusay sa barangay sa ilang problema magtiayon,” dugang ni Abad.

Gumikan niini, ang barangay niluwat na og barangay protection order (BPO) sa pagpanalipod sa asawa ug usa na ka buwan nga wala mag-ipon ang magtiayon tungod sa maong mando.

Sumala ni Abad, ang ginikanan sa biktima mopasaka og kaso batok sa bana.